Transcription(s) de cette page

Confians , 3 octobre [1465]. (français)

Mon très-redoubté seigneur et père, pour ce que je suis certain que désirés scavoir des nouvelles de par dechà, il est vray que depuis le partement du chevaucheur de mon escuierie, par lequel je vous ay nagaires et desrainement escript que la ville de Rouen, le chasteau, le palais et le pont d'icelle sont renduz et mis ès mains de beau frère de Bourbon, pour et ou nom de monseigneur de Berry, laquelle chose venue à la congnoissance de monseigneur le roy que ladite reddition fust faite par ses gens mesmes, qu'il avoit envoies en Normendie, il a esté plus prest de appointier avec mondit seigneur de Berry et les seigneurs du sang qu'il n'avoit encoires esté, et tellement qu'il a esté content de donner audit monseigneur de Berry en panage [apanage] la duchié de Normendie en tous drois, sauf et réservé seulement l'ommaige et souveraineté : et au regard de moy, il a esté et est content de me transporter et donner les terres qu'il a naguères rachetées de vous, pour en joïr par moy et mes hoirs, descendans et procréez de mon corps, au rachat de IIe mille escus, lequel rachat ne se porra faire ma vie durant. Et desjà sont commandées et ottroiées les lettres tant du fait de mondit seigneur de Berry comme du mien, par lesquelles lettres, touchant mon faict, le roy ma transporté aussi la conté de Bouloigne pour en joyr après vous, pour moy et mes hoirs, descendans de moy en ligne directe, la conté de Guines avoec les villes et chastellenie de Péronne, Mondidier et Roye, pour on joïr héritablcment et à tousjours. Et quand au beau frère de Bretaigne, et audit beau frère de Bourbon, et beau frère de Calabre, et aux aultres princes, le roy fait besoingnier avec leurs gens touchans leur appointement, et est la chose comme faite pour venir à bonne paix, laquelle, comme j'espoire, sortira bon et brief effect. Le roy m'a fait baillier et délivrer la place du bois de Vincenncs sur ma parolle seulement, et y sont mes gens qui la gardent, et pense que mondit seigneur de Berry se trouvera illec devers le roy pour faire son hommaige de la duchié de Normendie. Et ce jour d'huy nous sommes entreveus, monseigneur le roy et moy, sur le boore de la rivière de dechà la Seine, à privée compaignie, entre cy et Paris, et m'a dit icelluy monseigneur le roy beaucoup de belles parolles, desquelles et de tout le traitié de paix, selon qu'il se conduira, je vous advertiray en après et le plus brief que faire se porra. Au sourplus, mondit seigneur et père, nouvelles me sont présentement venues que le seigneur de Halbordin lequel estoit à Ponthoise, où je l'avoie envoie, est allé de vie à tiespas, pour laquelle cause je vous supplie en toute humilité qu'il vous plaise de vostre grâce, en faveur de la payne et travail que j'ay supporté