Transcription(s) de cette page

COMTE DE ROMONT AUX ETATS DES PAYS BAS (anglais)

Le comte dé Romont et de Sainct-Pol, etc., lieutenant général de mon très-redoubté seigneur monseigneur le duc de Bourgongne et de Brabant en tous ses pays;
Très-chiers et bien amez, merquedy derrenier passé, XVe jour de ce présent mois, nous estant logiés au village de Nostre-Dame de ce lieu, en intention de, ou nom de mondict très-redoubté seigneur et comme son lieutenant général, capitaine de son pays et conté de Flandres, nous transporter avant sondict pays de Flandres, pour y mettre les garnisons nécessaires à la seureté d'icelluy, monseigneur d'Autriche envoya pardevers nous Franche-Conté, son hérault et officier d'armes, par lequel il nous fist faire sommation de nous dé¬partir dudict lieu, et que luy feissions rendre mondict très-redoubté. Et pour tant que pour faire response sur ce à mondict seigneur d'Autriche, aussy vous en advertir, afin de scavoir se le mandement par luy expédié pour faire ladicte sommation, adrechant audict Franche-Conté, avoit esté faict à vostre sceu, comme il le conte-noit, envoyâmes dès lors par devers icelluy mondict seigneur d'Autriche le roy d'armes de Flandres, en intention qu'il duist parler à vous, et vous monstrer le double dudict mandement, pour en scavoir la vérité; ce qu'il ne s'a peu faire, obstant que ledict roy de Flandres a premièrement adressé à mondict seigneur d'Autriche, lequel le a fait tenir si estroitement et garder de si près, qu'il n'a peu avoir accez pour parler à vous et vous advertir de mon intention.